Qərbi Azərbaycan İcması Varşavada tədbir keçirdi

Qərbi Azərbaycan İcması oktyabrın 11-də Polşanın paytaxtı Varşavada ATƏT-in illik İnsan Ölçüsü Konfransı çərçivəsində “Evə qayıdış: Qaçqınların qayıdış hüququnun təmin edilməsi” mövzusunda tədbir keçirib.

ATƏT-in iştirakçı dövlətlərinin, beynəlxalq təşkilatların və insan hüquqları sahəsində ixtisaslaşan QHT-lər və mütəxəssislərin iştirakı ilə keçirilən tədbirdə təhlükəsiz və ləyaqətli qayıdışın insan hüquqlarının aliliyinin təmin edilməsi və dünyada köçkün probleminin davamlı həlli yolu kimi təşviq edilməsi yolları ətrafında fikir mübadiləsi aparılıb.

Tədbirdə Qərbi Azərbaycan İcmasının fəaliyyətinin məqsədləri, Qayıdış Konsepsiyası və Ermənistandan qovulmuş azərbaycanlıların sülh yolu ilə, təhlükəsiz şəkildə və ləyaqətlə qayıdışı istiqamətində indiyədək həyata keçirilən tədbirlər barədə məlumat verilib.

Qeyd edək ki, Ermənistan tərəfi növbəti dəfə qeyri-konstruktivlik nümayiş etdirərək İcmanın Konfransda iştirakına və sözügedən tədbiri təşkil etməsinə əngəl törətməyə cəhdlər göstərib. Lakin onların bu cədləri uğursuzluqla nəticələnib.