Qondarma rejimin bütün qurumları fəaliyyətini dayandırdı: qondarma "Artsax" ləğv edildi

Qarabağdakı qondarma rejimin “prezidenti” Samvel Şahramanyan 19 sentybr 2023-cü il tarixindən sonra yaranmış vəziyyətlə bağlı fərman imzalayıb. Bu barədə "Caliber" məlumat yayıb.

Fərmana əsasən, yaranmış gərgin hərbi-siyasi vəziyyətlə əlaqədar olaraq, Rusiya sülhməramlı komandanlığının vasitəçiliyi ilə Azərbaycan Respublikasının rəsmi şəxsləri ilə razılaşmalara əsasən mülki ermənilərin və silahı yerə qoymuş hərbçilərin öz nəqliyyat vasitələri və əmlakları ilə azad, könüllü və maneəsiz şəkildə Laçın yolu vasitəsilə hərəkətinə icazə verildiyi üçün qərara alınır:

“Dağlıq Qarabağ Respublikası”nın bütün dövlət təşkilatları və idarələri 1 yanvar 2024-cü il tarixinədək öz fəaliyyətini dayandırsın. Bu əmr qüvvəyə mindikdən sonra Qarabağın, o cümlədən hazırda kənarda olan əhalisi burada yaşamaq və geri qayıtmaq imkanları barədə müstəqil və fərdi qərar qəbul etmək məqsədilə Azərbaycan Respublikasının təqdim etdiyi reinteqrasiya şərtləri ilə tanış olsunlar.

Həmçinin bildirilir ki, bu fərman dərc edildikdən dərhal sonra qüvvəyə minir. Bu barədə Qarabağdakı qondarma rejimin “prezidenti” Samvel Şahramanyanın imzaladığı fərmanda deyilir.