"Aclıq oyunu" bitdi, Ermənistan uduzdu

Birləşmiş Millətlər Təşkilatının Təhlükəsizlik Şurasında aparılan müzakirələr bir daha göstərdi ki, Ermənistan havadarlarının dəstəyi ilə terror-təxribat əməllərini regional və beynəlxalq müstəvidə davam etdirsə də, beynəlxalq hüquq haqlı və ədalətli mövqeyi önəmli hesab edən Azərbaycanın tərəfindədir.

Çünki Təşkilatın 4 qətnaməsini yerinə yetirməyən İrəvanın iclasdan gözləntiləri nə məntiqə, nə də beynəlxalq hüquqa adekvat idi. Əbəs deyil ki, hətta qərəzli açıqlamaları ilə Azərbaycanın suveren hüquqlarına əks mövqedə olan ölkələr də Qarabağın Azərbaycan ərazisi olduğunu təsdiqləyib, reallığı qəbul edib. Ona görə də beynəlxalq hüququn Azərbaycan tərəfində olması və geosiyasi reallıq rəsmi Bakının əleyhinə qətnamələrin qəbul olunmasını blokladı və iclas Azərbaycanın növbəti diplomatik qələbəsi, Ermənistanın isə fiaskosu ilə nəticələndi.

Siyasi spekulyasiyalarla beynəlxalq ictimaiyyəti çaşdırmaq, sonda isə suyu süzülə-süzülə geri qayıtmaq Ermənistanın ənənəsinə çevrilib. Çünki Azərbaycan bu ölkədən fərqli olaraq suveren hüquqlarından istifadə edir, beynəlxalq hüququn norma və prinsiplərinə uyğun davranır. Yəni yalan ayaq tutsa da, yerimədiyi üçün Ermənistanın şər-böhtan kampaniyaları da qursağında qalır, əsassız iddiaları bumeranq effekti verir.

Qeyd edək ki, beynəlxalq hüquqa görə, bir ölkə digər ölkə ilə sərhədlərini müəyyənləşdirmək və təhlükəsizliyini qorumaq üçün özünü müdafiə etmək hüququna malikdir. Azərbaycan da sadəcə bu hüququndan istifadə edir. Bunun nəticəsidir ki, Ermənistanın qaldırdığı vəsatətlər bütün beynəlxalq təşkilatlar tərəfindən rədd edilir.