"Müqəddəs icma" inşası və ya tanrılığa iddia | Ermənilər nəyin axtarışındadır? - QARABAĞ XRONİKASI

“Qarabağ xronikası” verilişinin yeni buraxılışı yayımlanıb.

Verilişin aparıcısı, hərbi jurnalist Fərdin İsazadə budəfəki buraxılışda Xankəndinin ən hündür nöqtəsi – Kərkicahan qəsəbəsinin Yağlıtəpə yüksəkliyində inşa olunan nəhəng kompleksdəki erməni mifologiyasına söykənən simvollardan bəhs edib.

Bildirilib ki, qondarma erməni mifologiyasında Həyat Ağacı adlanan simvol mövcuddur:

“Həyat Ağacı yaranış konsepsiyasına eyham vuran fundamental simvoldur. Erməni toplumunun inancına görə, bu ağac yaşadığımız, yeraltı və ilahi dünyanı ifadə edir, birləşdirir. Bu miflərə əsasən, ağacın kökləri yeraltı səltənətə gedir, budaqlar isə göylərə doğru ucalır.

Erməni təbliğatı daha da irəli gedərək özlərini sadəcə bəşəriyyətin ilk insanları kimi deyil, ümumiyyətlə, yaranışın bünövrəsini qoyan ilahlar kimi təqdim etməyə çalışır”.

Qeyd edilib ki, mağaranın tavanında inşa edilən barelyefin üzərindəki ilk rəsm Böyük Partlayış nəzəriyyəsini əks etdirir:

“Barelyef üzərində təsvir olunan rəsmlərin ardıcıllığı bu şəkildədir: Böyük Partlayış, planetlərin yaranması, Nuh tufanı və Həyat Ağacı. Həmin ardıcıllıq təsadüfi deyil, vahid bir konsepsiya kimi düşünülüb. Eyni zamanda Nuh tufanına qədər baş verənlərin bəşəriyyət üçün əhəmiyyət daşımadığı ideyasını irəli sürür.

Erməni toplumu isə bu universal konsepsiyadan kənara çıxaraq heç bir xalqın etmədiyi iddianı irəli sürür. Onlar bilavasitə qədim mədəniyyət və sivilizasiyaların tək varisi olduqlarını iddia edirlər”.

Jurnalistin sözlərinə görə, erməni mifoloji konsepsiyasının əsas sütunlarından biri olan yaradılış və varislik iddiaları təkcə kosmoqonik təsəvvürlərlə məhdudlaşmır:

“Onlar həm də tarixi hadisələri milli kimliklərinə uyğun şəkildə yenidən formalaşdıraraq bəşəriyyətin mühüm dönəmlərini mifoloji konstruksiyalarında əks etdirirlər”.