"Onların əsassız çağırışı Trampa qarşı da təxribatdır" | Azərbaycan QHT-lərindən Rubioya müraciət

Azərbaycan QHT-ləri ABŞ Dövlət katibi Marko Rubioya müraciət edib.

Müraciətdə deyilir ki, ABŞ Dövlət katibinə məktub ünvanlamış bir qrup ABŞ konqresmeninin Azərbaycanın suveren əraziləri mövzusunda riyakarlığı, Azərbaycan və Ermənistan arasında sülh prosesinə qarşı fəaliyyəti Azərbaycan ictimaiyyətində kəskin hiddət doğurub.

Azərbaycan QHT-ləri bu cür birtərəfli yanaşmaları rədd edir və hesab edilir ki, Bayden-Blinken dövrünün ermənipərəst simaları faktiki olaraq ABŞ Prezidenti Donald Trampın Cənubi Qafqazda sülh səylərinə qarşı açıq təxribata əl atıblar. Sülh prosesini irəli aparmaq üçün işlər görüldüyü vaxtda bir qrup ABŞ konqresmeninin çağırışları bu prosesə mane olmaq, onu əngəlləmək cəhdindən başqa bir şey deyil. Onlar hər vəchlə süni gərginlik, regionda yenidən münaqişə ocağı yaratmağa çalışırlar.

Müraciətdə o da deyilir ki, məlum müraciəti təşkil edənlər ABŞ və Azərbaycan liderlərinin yazışmalarından da aydın görünən ikitərəfli əlaqələrin yeni yüksəliş mərhələsinə qədəm qoymasından narahatdırlar. Cənubi Qafqazda davamlı sülhün bərqərar olması istiqamətində təqdirəlayiq əmək sərf edən Donald Tramp Administrasiyasının “Vaşinqton bataqlığı”nın təmsilçiləri olan bu konqresmenlərin fəaliyyətinə doğru qiymət verəcəyinə ümid edilir.