Azərbaycan, Rusiya və Ermənistan liderləri yenidən görüşəcək

Ermənistanın Baş naziri Nikol Paşinyan Ermənistan tərəfinin Moskvada Rusiya və Azərbaycan liderlərinin iştirakı ilə üçtərəfli görüşə razılıq verdiyini açıqlayıb.

Bu barədə o, hökumətin mayın 18-də baş tutan iclasında bildirib. N.Paşinyan müvafiq təklifin Rusiya tərəfindən edildiyini və Ermənistanın bunu qəbul etdiyini vurğulayıb. Görüşün mayın 25-də keçirilməsinin planlaşdırıldığını deyib.

Baş nazir əlavə edib ki, mayın 19-da Moskvada xarici işlər nazirləri səviyyəsində üçtərəfli danışıqların keçirilməsi də planlaşdırılır.

N.Paşinyan Brüsseldə Ermənistan və Azərbaycanın bir-birinin ərazi bütövlüyünü tanıması mövzusuna da toxunub. O, bunu mühüm addım adlandırıb.

Ermənistanın Baş naziri qeyd edib ki, bu, regionda sabitliyin bərqərar olmasına və sülh müqaviləsinin mətnini yekunlaşdırmağa imkan verəcək. Növbəti addım delimitasiya komissiyasının formalaşdırılması üçün əsasların müəyyən edilməsi olmalıdır.