Rusiyalı politoloq: Zəngəzur bütövlükdə Azərbaycanın nəzarətinə keçə bilər

İkinci Qarabağ müharibəsindəki qələbə və son 3 ildə Azərbaycanın yürütdüyü uğurlu siyasət Ermənistana heç vaxt unutmayacağı məğlubiyyət yaşatdı.

Bütün bu uğursuzluqlarının səbəbini isə İrəvan birbaşa olaraq Moskvada axtarmağa başladı. Müharibə zamanı Rusiya əsgərlərinin də ermənilərlə birlikdə Azərbaycana qarşı vuruşacağına ümid bəsləyən Nikol Paşinyanın gözləntiləri puç oldu. Halbuki, rəsmi Moskvanın İrəvan qarşısında belə bir öhdəliyi yox idi. Ermənistanda keçirilən anti-Rusiya aksiyaları fonunda erməni Baş nazir də illərdir onlara havadarlıq edən Kremldən üz döndərərək Qərbə sığınmağı daha uyğun bildi.

Bu müddətdə Rusiya əleyhinə müxtəlif fikirlər səsləndirən Nikol Paşinyan Kremli öz öhdəliklərini yerinə yetirməməkdə ittiham edib, Qarabağda müvəqqəti yerləşdirilən sülhməramlıların fəaliyyətindən razı olmadığını dilə gətirib. Çıxışlarının birində isə o, sülhməramlı kontingentin Qarabağdakı fəaliyyət müddətinin sonunda Ermənistana deyil, Rusiyaya qayıtmalı olduğunu deyib.

Rusiyalı politoloq Sergey Markov bildirib ki, sülhməramlılar müddətləri bitdikdən sonra daimi xidmət bölmələrinə gedəcəklər: “Onların bir qismi Rusiya, digər hissəsi isə Gümrü ərazisində daimi xidmətdədirlər. Onlar 2025-ci ilə qədər Qarabağdakı mövcudluğunu davam etdirəcəklər. Çünki Azərbaycan bütün öhdəliklərini yerinə yetirən multikultural müasir ölkədir.

Ermənistan rəhbərliyi isə Moskva ilə münasibətləri tədricən kəsərək Rusiyanın düşmənləri olan Fransa, Avropa İttifaqı və ABŞ ilə müttəfiqlik əlaqələri qurmağı qarşısına məqsəd qoyub.

Məlum məsələdir ki, bu, Qarabağ müharibəsində rusiyalıların ermənilərlə birgə Azərbaycana qarşı vuruşmaq istəməməsindən Ermənistan rəhbərliyinin məyus olması ilə bağlıdır.

Nikol Paşinyan öz tarixi missiyasını, Ermənistanı Rusiyadan qoparıb Qərbə bağlamaq kimi planlarını həyata keçirmək istəyir. O, həmişə qərbyönümlü siyasətçi olub. Bu, onun üçün uzun və çətin proses olacaq. Bu proses N.Paşinyanın hakimiyyətdən getməsi ilə bitəcək, ya da Ermənistan Ukrayna və Gürcüstanın yolunu tutacaq”.

Sergey Markov əlavə edib ki, ABŞ və Fransa Ermənistanı Rusiya ilə münasibətləri kəsməsi üçün dilə tutur. Qərbin planına əsasən, İrəvan KTMT-ni də tərk etməlidir ki, bunun da sonu öz sərhədlərinin müdafiəsini başqa ölkəyə etibar edən Ermənistan hakimiyyəti üçün yaxşı aqibət vəd vermir. Belə olan halda nəinki nəqliyyat dəhlizi, bütövlükdə Zəngəzur Azərbaycanın nəzarətinə keçə bilər.