Rusiyanın Xankəndiyə göndərdiyi ərzaq yüklü avtomobil gecikir

Rusiyanın Qarabağda yaşayan erməni əhali üçün göndərdiyi ərzaq yüklü avtomobilin Xankəndiyə keçidi gecikir.

Xankəndidə yaşayan erməniəsilli sakinlər üçün nəzərdə tutulan yardımın bu gün saat 10 radələrində Əsgərana keçidinin təmin olunması nəzərdə tutulsa da, yük maşını hələ ki Bərdə rayonunda gözləyir. Keçidin ləngiməsinə səbəb kimi Qarabağdakı separatçıların növbəti qeyri-konstruktiv mövqeyi göstərilir. Digər məlumata görə, Beynəlxalq Qırmızı Xaç Komitəsi və Qərbin Rusiya Qırmızı Xaç Cəmiyyətinə təzyiqi nəticəsində belə vəziyyət yaranıb.

Xatırladaq ki, Rusiya hökumətinin təşəbbüsü ilə Azərbaycan Qızıl Aypara Cəmiyyəti və Rusiya Qırmızı Xaç Cəmiyyətinin birgə əməkdaşlıq memorandumuna əsasən, Rusiya tərəfindən Azərbaycanın Qarabağ iqtisadi rayonunda yaşayan erməni sakinlərin ərzağa olan ehtiyaclarının qarşılanması məqsədilə Rusiya Qırmızı Xaç Cəmiyyəti tərəfindən ərzaq və qeyri-ərzaq məhsulları ilə dolu ümumilikdə 1 TIR göndərilib.