Sülhə mane olan separatçılar Paşinyana qarşı

Qarabağdakı separatçılarla Ermənistan hakimiyyəti arasında ciddi fikir ayrılıqları yaranıb.

Belə ki, qanunsuz silahlı birləşmələr Ermənistanın Baş naziri Nikol Paşinyanın Qarabağı Azərbaycanın bir parçası kimi tanıması ilə bağlı səsləndirdiyi fikirləri pisləyib, bütün erməniləri ayağa qalxmağa çağırıblar. Bu isə həm iki rejim arasında ixtilafları daha da dərinləşdirib, həm də Qarabağ separatçılarının arxasında başqa qüvvələrin dayandığını göstərir.

Reallıq budur ki, Ermənistan yeni siyasi mühitə daxil olur. Çünki 30 il ərzində İrəvanla separatçılar arasında bu dərəcədə fikir ayrılığı olmayıb. Nikol Paşinyan Azərbaycanın diqtə etdiyi yeni reallığı qəbul etsə də, separatçılar əlində maşaya çevrildikləri güc və ya güclərin təsiri ilə münaqişəyə zəmin yaratmaqda, dolayısı ilə iki ölkə arasında sülh və sabitlik mühitinin bərqərar olmasına əngəl törətməkdə davam edir.