Sülhməramlılar Zəngəzura göndəriləcək? - rus ekspertdən gözlənilməz çıxış

2020-ci il noyabrın 10-da Azərbaycan, Rusiya və Ermənistan arasında Üçtərəfli Bəyanatın imzalanmasından artıq 3 il keçir. Bəyanat Qarabağ münaqişəsi ilə bağlı məsələlərin həllini nəzərdə tutur və ötən dövr ərzində onun bir sıra bəndləri icra olunub.

Bundan sonra həmin sənədlə bağlı hansı işlər görülməlidir? Bu məsələ ilə bağlı sualları rusiyalı hərbi ekspert Yevgeniy Mixaylov cavablandırıb.

O bildirib ki, Bəyanatın imzalanmasından 3 il keçməsinə baxmayaraq, İrəvan sərhədlərin demarkasiya və delimitasiyası baxımından üzərinə düşən öhdəlikləri yerinə yetirməyib:

“Məhz antiterror əməliyyatından sonra Ermənistan məcbur olub qanunsuz hərbi birləşmələrini Qarabağdan çıxardı. İndi isə Azərbaycan Zəngəzur dəhlizinin reallaşdırılmasına çalışır. Bu, bəyanatda yer alan ən vacib məqamlardan biridir. İrəvan isə öhdəliklərdən boyun qaçırır. Ermənistan Zəngəzur dəhlizini açmasa, sülh müqaviləsindən söhbət gedə bilməz. Bu vəziyyətdə Azərbaycan İran vasitəsilə Naxçıvana yolunu açsa, o zaman Ermənistan daha çox şey itirəcək və regional layihələrdən kənarda qalacaq”.

Azərbaycanın suverenliyini bərpa etdiyini vurğulayan Yevgeniy Mixaylov Qarabağda müvəqqəti yerləşdirilən Rusiya sülhməramlı kontingentinin 2025-ci ildən sonra taleyinin necə olacağı məsələsinə də aydınlıq gətirib:

“Bakı və Moskvanın iki müttəfiqlik müqaviləsi var. Biz bir çox sahələrdə strateji tərəfdaşıq. Bizim Azərbaycanla çox gözəl münasibətlərimiz var. Belə bir variant var ki, sülhməramlılar Zəngəzur dəhlizini qorumaq üçün ora göndərilə bilərlər. Bu barədə hər hansı dəqiq bir fikir bildirmək bir az çətindir, çünki biz bilmirik Ermənistan və onu dəstəkləyən Fransa sabah özünü necə aparacaq. Biz bilmirik onlar nə planlar qururlar”.

Rusiyalı hərbi ekspert onu da əlavə edib ki, Cənubi Qafqaz Rusiyanın strateji maraqlarına uyğun regiondur.