Təhdid dolu mesajlar separatçılara baha başa gələcək

Zaman-zaman uydurma yalanlar hesabına öz toplumlarını girdaba yuvarlayıb, onun üzərində özləri üçün var-dövlət səltənəti quran erməni millətçiləri hələ də öz iddialarından əl çəkmək istəmirlər. Səbəb bəllidir. İllərdən bəri yalan, riyakarlıq, tökülən müsəlman-türk qanı hesabına əldə etdikləri şəxsi rahatlığı itirmək onlara çətindir.

Xankəndindəki separatçı rejimin başçısı Arayik Arutyunyanın növbəti sərsəmləməsi də məhz bununla bağlıdır. Öz aləmində guya Azərbaycanı təhdid edən terrorçu iddia edir ki, əgər bir həftə ərzində beynəlxalq müdaxilə ilə qondarma rejimdə vəziyyət stabil kursa qayıtmasa, daha sərt addımlara əl atacaqlar. Sarsaqlığın yaratdığı dərdin ağırlığına bir baxın. Bu ünsür hələ də başa düşmür ki, dünyanın ayrı-ayrı ölkələrindən erməni millətçilərini Qərbi Azərbaycana toplayan Çar Rusiyası da, bu ərazidə qondarma Ermənistan adlı terrorçu dövləti yaradan Sovet Rusiyası da artıq tarixə qovuşub. İndi daha 1990-cı illər deyil ki, Kremlin canişinləri azərbaycanlıların əl-qolunu bağlayıb, erməniləri təpədən-dırnağa kimi silahlandıralar. Getdi o dövran, Arayik. İndi Cənubi Qafqazda saatların əqrəbləri Azərbaycanda qurulur. Rusiyanın sülhməramlı qüvvələri sabitlik üçün cavabdeh olduqları ərazilərdə sənin başçılıq etdiyin qanunsuz silahlı birləşmələrə qarşı ciddi tədbirlər görməsələr, halınız onsuz da acınacaqlı olacaq.

44 günlük savaşda yaratdığınız haray-həşir özünüzə qaldı. Görünür, bu, hələ də sizə dərs olmayıb. Tıxanan qulaqlarınızı açıb eşidin və başa düşün ki, uydurma nağıllarınız artıq keçərli deyil, beynəlxalq aləm öz sözünü çoxdan deyib. Ermənistanın Baş naziri Nikol Paşinyan da bir daha bütün dünyanın gözünün içinə baxa-baxa Azərbaycanın ərazi bütövlüyünü tanıdıqlarını elan etdi. Arayik Arutyunyan, daha səndən nə ayın tarixini, nə də nəyin nə vaxt baş verəcəyini soruşan olmayacaq. Yəqin ki, ən qısa zamanda sən və sənin kimilərin əzab-əziyyətindən cana doyan ermənilər ayağa qalxıb, elə Xankəndinin ortasında boğazına ip dolayacaqlar. Onda başa düşəcəksən ki, dildə beynəlxalq ictimaiyyət deyib, əslində isə nəzərdə tutduğun erməni lobbisi çoxdan oyundan kənar vəziyyətə düşüb. Atmaq istədiyiniz qəti addım səni və sənin kimiləri ağzı dar, dərin quyuya salacaq.