TÜRKPA-nın baş katibindən Heydər Əliyevlə bağlı açıqlama

“Türk dünyasında hər sahədə müsbət dinamika ilə və hər keçən il daha fəal inkişaf edən əməkdaşlıq günümüzdə Ulu Öndərin uzaqgörən ideyalarının aydın təcəssümüdür”.

Bunu TÜRKPA-nın Baş katibi Mehmet Süreyya Er Bakıda Ümummilli Lider Heydər Əliyevin 100 illik yubileyinə həsr edilmiş “Heydər Əliyev və parlamentarizm” mövzusunda konfransda çıxışı zamanı deyib.

O bildirib ki, xalqına bağlı olan lider Heydər Əliyevin siyasi müdrikliyi və mütərəqqi ideyaları dövlətin gələcək hərtərəfli inkişafı üçün etibarlı bünövrəyə çevrilib:

“Heydər Əliyevin xalqın milli kimliyi, tarixi keçmişi və ana dilinə verdiyi önəm onun türk dünyasının birliyi istiqamətində yorulmaz fəaliyyəti ilə səsləşir. Heydər Əliyev siyasi kursunun qabaqcıl istiqamətlərindən biri türk dövlətləri arasında birlik, həmrəylik və əməkdaşlığın inkişafı ilə bağlı olub. Böyük öndər türk dünyasının birliyi fikrini daim diqqət mərkəzində saxlayıb və türk xalqlarının yaxınlaşmasının vacibliyini vurğulayıb. Onun ardıcıl və məqsədyönlü fəaliyyətinin uğurlu nəticələri bu istiqamətdə davamlı addımların atılmasına mühüm töhfə verib”.