Türkiyə bu ölkələrlə müdafiə sənayesində əməkdaşlığa hazırdır | Hulusi Akar Bakıda çıxış etdi

“Milli təhlükəsizliyin təmini ancaq güclü ordu ilə mümkündür. Bunu Azərbaycanın Qarabağ müharibəsində əldə etdiyi zəfər bütün dünyaya göstərdi. Qarabağ zəfəri təkcə Azərbaycan, Türkiyə deyil, bütün Türk dünyası, o cümlədən dünya üçün nümunə olub”.

Bu fikirləri Türkiyə Böyük Millət Məclisinin Milli müdafiə komissiyasının sədri Hulusi Akar TÜRKPA-ya üzv ölkələrin parlamentlərinin müdafiə və təhlükəsizlik üzrə komitələri sədrlərinin ikinci iclasında səsləndirib.

O qeyd edib ki, Türkiyə təşkilata üzv dövlətlərlə müdafiə sənayesi sahəsində əməkdaşlığa hazırdır:

“Azərbaycan və Türkiyənin ortaq ordusunun formalaşdırılması davamlı prosesdir. Bir millət olmaqla yanaşı, həm də bir orduyuq. Hazırda tək ordu istiqamətində proses davam edir. Azərbaycan və Türkiyə müdafiə sahəsində birgə çalışmalıdır. Bunun üçün birgə hərbi təlimlər şərtdir. Silahlar, təchizatlar uyğunlaşdırılmalıdır. Proses uğurla davam edir”.

TÜRKPA-nın Baş katibi Mehmet Süreyya Er isə bildirib ki, türk dövlətləri strateji maraqlar, regional təhlükəsizlik və sabitlik istiqamətində birgə əməkdaşlıq edir. Əməkdaşlığın institusionallaşmasında həm Türk Dövlətləri Təşkilatı, həm də TÜRKPA əsas platformalardır.