XİN mina partlayışından sonra çağırış etdi
Xarici İşlər Nazirliyi Ağdamda baş verən və iki nəfərin ölümü ilə nəticələnənə mina partlayışı ilə bağlı məlumat yayıb.
Bildirilib ki, 44 günlük Vətən müharibəsindən indiyə qədər ümumilikdə 286 nəfər minaya düşüb, onlardan 48-i həlak olub.
“Ağdamda baş verən mina partlayışı bir daha onu göstərir ki, düzgün mina xəritələrini təqdim etməyən, üçtərəfli bəyanatı kobudcasına pozaraq Azərbaycan ərazisində hərbi fəaliyyəti, minaların daşınmasını və yerləşdirməsini davam etdirən Ermənistanın əsas məqsədi postmünaqişə dövründə aparılan genişmiqyaslı bərpa-quruculuq işlərinə, bu ərazilərdə fəaliyyət göstərən mülki əhaliyə, habelə məcburi köçkünlərin geri qayıtmasına və öz yerlərində dinc yaşamasına maneçilik yaratmaqdır.
Ermənistanın bu addımları regionda sülh, təhlükəsizlik və əməkdaşlığın reallaşdırılmasına başlıca əngəl olmaqda davam edir. Beynəlxalq ictimaiyyəti Ermənistanın beynəlxalq öhdəliklərini kobud şəkildə pozmasına, o cümlədən məqsədli şəkildə minalar yerləşdirmək siyasətinə göz yummamağa və Ermənistandan beynəlxalq hüquq qarşısında üzərinə götürdüyü öhdəliklərini yerinə yetirməsini tələb etməyə çağırırıq”, - deyə məlumatda qeyd edilib.