Zaxarovadan Ermənistana mesaj

“Ermənistana ancaq Cənubi Qafqazda Qərbin aləti rolu verilir”.

Bu barədə Rusiya Xarici İşlər Nazirliyinin mətbuat xidmətinin rəhbəri Mariya Zaxarova həftəlik brifinq zamanı bildirib.

“Aydın məsələdir ki, Vaşinqton və Brüsseldə Rusiya və Ermənistan arasında həm təhlükəsizlik, həm də iqtisadiyyat sahəsində bütün əlaqələri pozmaq, eləcə də Kollektiv Təhlükəsizlik Müqaviləsi Təşkilatı və Avrasiya İqtisadi Birliyinin mexanizmlərini korlamaq məqsədi qoyulub.

Qərb ölkələri Cənubi Qafqazda yaxın qonşuların arasını vurmağa çalışır və burada Ermənistan Cənubi Qafqazda vəziyyəti gərginləşdirmək üçün ABŞ və Avropa İttifaqının sadəcə alətidir”, – o qeyd edib.

M.Zaxarova Aİ, ABŞ və Ermənistan arasında Brüssel görüşündə qəbul edilən sənədi də şərh edib:

“Sənəddə rus sülhməramlılarının ABŞ, Aİ və NATO mütəxəssisləri ilə əvəz olunması, amerikalıların və ittifaqın Ermənistan sərhədində Azərbaycan və İrana qarşı pozucu fəaliyyətinin genişləndirilməsi, eləcə də Ermənistanın kritik əhəmiyyət kəsb edən infrastruktur və enerji sisteminin təkrar yönləndirilməsi nəzərdə tutularsa, buna təəccüblənmərik.

Həqiqətən, ABŞ və Aİ nümayəndələri aktiv şəkildə bu fikirləri İrəvana təlqin ediblər. Ermənistana ancaq Cənubi Qafqazda Qərbin aləti rolu verilir. Qərb Cənubi Qafqazda yeni münaqişə ocağı yaratmaq istəyir. Çünki onlar ancaq bunu etməyi bacarırlar.

Qərb Ermənistanı milli olan hər şeydən məhrum etmək istəyir. Məqsədlərinə çatandan sonra isə Ermənistanı meydanda tək qoyacaqlar”.