Alkoqol istehlakı insan orqanizmdə hansı fəsadlara yol açır? | Araşdırma

Həftəlik səkkiz dəfə və ya daha çox spirtli içki qəbul edən insanlar yaddaş və düşünmə qabiliyyətinə təsir edən beyin zədələnməsi əlamətlərinə daha çox məruz qalırlar.

Tibb üzrə fəlsəfə doktoru Alberto Fernando və komandasının apardığı tədqiqat “hialin arterioloskleroz” adlanan damar problemi ilə alkoqol istehlakı arasındakı əlaqəni aşkara çıxarıb. Bu vəziyyət beyindəki kiçik damarların sərtləşməsi və daralması ilə xarakterizə olunur ki, bu da toxumalara qan axınının azalmasına və nəticədə beyin toxumasının zədələnməsinə səbəb olur.

Tədqiqatda ölüm yaşları orta hesabla 75 olan 1781 nəfərin beyin toxuması təhlil edilib. Onların içki vərdişləri ailə üzvlərinin verdiyi məlumatlara əsasən dəyərləndirilib və iştirakçılar dörd qrupa ayrılıb: heç vaxt içməyənlər, orta dərəcədə içənlər, çox içənlər və keçmiş çox içənlər.

Məlum olub ki, heç vaxt içməyənlərin 40 faizində beyin damarlarında zədələnmə görülüb. Bu göstərici orta dərəcədə içənlərdə 45, çox içənlərdə 44, keçmiş çox içənlərdə isə 50 faiz olub.

Bu nəticələr spirtli içkilərin beyin sağlamlığına uzunmüddətli təsirini anlamaq və ictimai sağlamlıq tədbirləri görmək baxımından mühüm əhəmiyyət daşıyır.