Arıqlamaqla bağlı miflərə son: həkimlərdən yekun açıqlama

Bəzi insanlar fiziki sağlamlığı, bəziləri də xarici görünüşü üstün tutaraq ideal çəkidə olmaq üçün sözün əsl mənasında mübarizə aparırlar.

Amma bunu kor-koranə şəkildə edib, qaş düzəldərkən göz çıxarmaq ehtimalının olduğunu da unudurlar. Adətən idman üçün vaxt ayıra bilməyən, oturaq iş tərzi sürən və pəhrizə gücləri çatmayan insanların bir seçimi olur – arıqlama çayları.

Bu cür çayları satanların iddiasına görə, həmin məhsullar idman və pəhriz olmadan da işə yarayır. Təklif olunan belə çayların qiyməti də heç də ucuz deyil. Ancaq bu çayları nə idmançılar, nə də dietoloqlar məsləhət görürlər.

“Arıqlamaq kapsulları, çaylar, əməliyyat olunmaq – bunların hamısı insan orqanizmində fəsadlara səbəb ola bilər. Arıqlamağın ən doğru üsulu insanı kökəldən səbəbə qarşı müalicə olunmaqdır”, – deyə dietoloq qeyd edib.

Qısacası, cəmiyyətin bəlasına çevrilən artıq çəki problemindən qısa zamanda xilas olmaq, sürətli arıqlamaq üçün qarnınızın doyduğu qədər yesəniz, yüngül idman hərəkətləri etsəniz, arzuladığınız çəkidə ola bilərsiniz.