Aşiq olduğumuzu necə hiss edə bilərik? | Bu hissləri keçirirsinizsə…

Duyğuların zirvəsi olan sevginin kökündə mürəkkəb biokimyəvi proseslər dayanır. Sevgi də adətən aşiq olmaqdan başlayır. Aşiq olduqda isə orqanizm bir sıra hormonal və nevroloji dəyişikliklərə məruz qalır. Bu dəyişikliklər təkcə hisslərimizə deyil, həm də fiziki sağlamlığımıza təsir edir.

Bəs baş verən dəyişikliklər hansılardır?

Alimlərin fikrincə, ilk pillədə dopamin artımı, başqa sözlə, xoşbəxtlik partlayışı gəlir. Yəni aşiq olduğumuzda bu hormon sürətlə yüksəlir və beyində “xoşbəxtlik hormonu” partlayışı yaşanır. Daha sonra oksitosin yüksəlir ki, bu hormon sayəsində qarşı tərəfə güvən və bağlılıq hissi yaranır.

Növbəti mərhələdə adrenalin artır. Bu zaman ürək döyüntüsü sürətlənir, əllər tərləyir, bədən həyəcanlanır. Daima həmin şəxsi düşünməyimiz serotoninin azalmasından xəbər verir.

Kortizolun yüksəlməsi stres və gərginliyə səbəb olur. Aşiq olanlar bəzən özlərini halsız hesab edir ki, bu da immunitetin zəiflədiyini göstərir.

Bundan başqa, insanda diqqət dağılır, qüsurlar görünmür. Nəticədə gündəlik işlərə fokuslanmaq çətinləşir və qarşı tərəfin mənfi yönlərini görmək də olmur və nəhayət, aşiqlərin risk alma istəyi artır. Yəni insan bu dönəmdə daha cəsarətli və macərapərəst olur.

Odur ki, eşqə düşdüyünüz zaman bu kimi proseslərə hazır olmaq lazımdır.