Bakı Slavyan Universitetinin sabiq rektoru Türkiyəyə qaçdı

Barəsində məcburi məhkəməyə gətirilmə qərarı qəbul olunan Bakı Slavyan Universitetinin sabiq rektoru Nurlana Əliyeva ölkəni tərk edib.

APA-nın xəbərinə görə, bu barədə fevralın 20-də Bakı Ağır Cinayətlər Məhkəməsində hakim Əli Məmmədovun sədrliyi ilə keçirilən iclasda elan olunub. Həmin universitetin əlavə və qiyabi təhsil şöbəsinin sabiq müdiri Dürdanə Əliyevanın cinayət işi üzrə keçirilən məhkəmə prosesində bildirilib ki, sabiq rektor ölkədə deyil, hazırda Türkiyənin Ankara şəhərindədir və ölkəyə daxil olan kimi polis vasitəsilə məhkəməyə gətiriləcək.

Qeyd edək ki, Baş Prokuror yanında Korrupsiyaya qarşı Mübarizə Baş İdarəsində Bakı Slavyan Universitetinin əlavə və qiyabi təhsil şöbəsinin müdiri, dosent Dürdanə Əliyeva barəsində araşdırma aparılıb. Onun barəsində külli miqdarda dələduzluq, rüşvət alma maddələri ilə cinayət işi başlanılıb. Dürdanə Əliyeva məhkəmədəki ifadələrində ittihamda qeyd olunan əməlləri sabiq rektor Nurlana Əliyevanın iştirakı ilə etdiyini bildirib. Nurlana Əliyeva da öz növbəsində Dürdanə Əliyevadan şikayət edib. Onun sözlərinə görə, sabiq şöbə müdiri qulluq mənafeyindən istifadə edərək tələbələrdən aldığı pulları mənimsəyib.

Bundan başqa, Nurlana Əliyeva Dürdanə Əliyevanı ona cadu etməkdə ittiham edib və bildirib ki, cadunun təsirindən xəstəlik keçirib. Dürdanə Əliyeva müraciətində Nurlana Əliyevanın əməlləri ilə bağlı məlumat verib, özünün cinayət işində sadəcə vasitəçi olduğunu qeyd edib.