Təqdirəlayiq qərar | Kişilərin müəllimlik peşəsinə marağının artması üçün nə lazımdır? - Baku TV

Azərbaycan məktəblərində gender disbalansı davam edir: hazırda ümumi müəllim heyətinin cəmi 18 faizini kişilər təşkil edir. Məktəbəqədər, orta və orta ixtisas təhsili müəssisələrində qadın pedaqoqların payı 80 faizə, məktəbəqədər təhsildə isə 99,9 faizə çatır.

Ekspertlərin fikrincə, bu vəziyyət uşaqların şəxsiyyət kimi formalaşmasına, sosiallaşmasına və təhsilin keyfiyyətinə mənfi təsir göstərir. Uşaqların həm evdə, həm də təhsil müəssisələrində əsasən qadınların ətrafında böyüməsi oğlan şagirdlərin kişi rol modeli görməməsinə gətirib çıxarır.

Problemin həlli istiqamətində ilk addımı Bakı Slavyan Universiteti atıb. Ali məktəb ibtidai sinif və xarici dil müəllimliyi ixtisaslarına 450-dən yuxarı bal toplayaraq qəbul olan oğlan tələbələrə xüsusi təqaüd verəcək.

Sosiologiya üzrə fəlsəfə doktoru Üzeyir Şəfiyev bu qərarı təqdirəlayiq addım kimi qiymətləndirib.

O bildirib ki, həm kişi, həm də qadın pedaqoqların özünəməxsus keyfiyyətləri var və təlim-tərbiyə prosesində tərəflərdən birinin üstünlük təşkil etməsi balanslı psixoloji mühiti zəiflədir.

Sosioloq vurğulayıb ki, təhsil sistemindəki bu disbalansın tənzimlənməsi üçün stimullaşdırıcı tədbirlər davam etdirilməlidir.