Boyaların solmasına nə səbəb olur? - Maşını yuyarkən etdiyimiz səhvlər

Avtomobilinizin boya örtüyü yayda Günəş, toz və istiliyin təsirindən ciddi zərər görə bilər.

Bu baxımdan “Pravda.ru” boya örtüyünü qorumaq üçün sadə, lakin effektiv bir neçə qayda tövsiyə edir.

İlk olaraq, birbaşa Günəş altında avtomobili yumayın. Bu, ləkə və mikroçatlara səbəb olur. Avtomobili sərin havada və kölgədə yumaq məsləhətdir.

Tövsiyə edilir ki, zərərli çirkləri dərhal təmizləyin. Quş peyini, həşərat izləri və digər qalıqlar boyanı zədələyir. Ona görə də su və mikrofiber bezlə dərhal silin. Quru bezlə təmizləməyin.

Kuzovu mütəmadi olaraq yuyun. Hətta görünməsə də, toz və qum dənəcikləri gövdədə cızıqlar əmələ gətirir. Bu baxımdan avtomobili 7-10 gündə bir yumaq tövsiyə olunur.

Bundan başqa, qoruyucu vasitələrdən istifadə edin. Maye mum, sprey və ya mövsümi keramika qoruması ultrabənövşəyi şüalarından müdafiə edir.

Digər bir məsələ parklanmadır ki, daim Günəş altında qalmaq boyanın solmasına səbəb olur. Bu səbəbdən mümkün qədər kölgədə saxlayın, tentlər və örtüklərdən istifadə edin.

Çat və boya qopmalarını vaxtında aradan qaldırın. Çünki yayda bu xırda zədələr böyüyə bilər. Həmin xırda zədələrin böyümədən aradan qaldırılmasına boya qələmi və qoruyucu üzlük kömək ola bilər.