Bu cür qidalanma öd kisəsinə elə ziyan vurur ki... | Həkimlər həyəcan təbili çaldı

İnd ödü normal işləyən pasiyent yoxdur. Bu ultrasəs müayinəsi mütəxəssislərinin yarızarafata dediyi sözdür. Çünki müasir həyat tərzi və qidalanma öd kisəsinin fəaliyyətini pozur.

Öd kisəsini bəzən zəhər torbası da adlandırırlar. Qaraciyərin altında, az qala bitişik yerləşib, öd turşusu anbarı rolunu oynayır, bütün həzm prosesində iştirak edir. Armuda bənzər formadadır, özünün yolları var. Orqan qaraciyərdən gələn öd şirəsini yığır və öz axacaqları vasitəsilə bağırsağa ötürür, orada həzm baş verir.

Öd kisəsinin çətin işlədiyini göstərən əlamətlərdən biri sancıdır. Əsasən səhərlər, insan ac olanda və qida qəbulundan sonra bu ağrılar başlayır. Ağrı kifayət qədər intensivdir və çiynə, qola, belə yayıla bilər. Ağrı əsasən öd kisəsi iltihabında, daşması zamanı, eləcə də daş olanda hiss olunur. Daş hərəkət etdikcə ağrı artır. Öd yolu çox nazik, ensizdir. Oraya daşın düşməsi isə olduqca təhlükəlidir. Mütəmadi ürəkbulanma, ağır yeməkdən sonra qusma da əlamətlər arasındadır. Mədədə yanğı, qıcqırma da həyəcan təbili çalmağa əsas verir.

Hər yeməkdən sonra mədədə yanma, gəyirmə, hıçqırma, ağza acı öd dadı gəlməsi əlaməti varsa, bu öd daşı problemidir. Əgər dəriniz, göz içi, ovuclar sanki gündə qaralmış, yanmış kimi rəng alırsa, saralırsa, bu öd yollarının tam tutulmasının əlamətidir.

Sidiyin tündləşməsi, nəcisin isə ağarması öd kisəsi pozulmasının birinci siqnalıdır. Əgər sizdə qrip, virus olmadan, qızdırma, titrəmə baş verirsə, yanaşı olaraq, ürəkbulanma, qarında, sağ qabırğaaltında küt ağrı varsa, çox güman ki, öd axarı tutulub, öd kisəsində iltihab və infeksiya var. Bu çox kəskin vəziyyətdir və təcili yardım, xəstəxanaya müraciət mütləqdir.