Bu gün 55 mindən çox şagird imtahan verdi

Dövlət İmtahan Mərkəzi aprelin 7-də 9 illik orta təhsil səviyyəsi üzrə buraxılış imtahanı keçirib.

İmtahan keçirilən şəhər və rayonlarda ümumilikdə 233 imtahan binası, 4158 imtahan zalı ayrılıb.

İmtahanların idarə olunmasına 674 imtahan rəhbəri və ümumi rəhbər, 5193 nəzarətçi, 757 buraxılış rejimi əməkdaşı, 233 bina nümayəndəsi təyin edilib.

İşğaldan azad olunmuş Laçın, Füzuli və Zəngilan rayonlarında da buraxılış imtahanı baş tutub. DİM ilk dəfə yeni istifadəyə verilmiş Laçın şəhər 2№-li tam orta məktəb, Zabux kənd tam orta məktəbi və Füzulidə Uluqbəy adına 1№-li məktəbdə 9 illik orta təhsil səviyyəsi üzrə buraxılış imtahanı keçirib.

Ümumilikdə 55 887 şagirdin iştirakının nəzərdə tutulduğu imtahanda sağlamlıq imkanları məhdud 25 şagird də iştirak edib.

İlkin məlumatlara əsasən, 3 nəfərdə mobil telefon, 2 nəfərdə isə smart saat aşkar edildiyi üçün imtahandan xaric edilib və araşdırma aparılır. Bundan əlavə, 1 nəfərdə yoluxucu xəstəlik – suçiçəyi müşahidə olunduğu üçün binada olan təcili tibbi yardım üzrə həkimin rəyinə uyğun olaraq imtahana buraxılmayıb.