Daxili Qoşunların yaranması günü qeyd edilib
Martın 12-də Daxili İşlər Nazirliyinin Daxili Qoşunları yaranmasının növbəti ildönümünü qeyd edib.
Bu münasibətlə daxili işlər naziri general-polkovnik Vilayət Eyvazov, Daxili Qoşunların rəhbər heyəti və hərbi qulluqçuları Fəxri xiyabanda ulu öndər Heydər Əliyevin xatirəsini yad ediblər. Sonra Şəhidlər xiyabanı ziyarət olunub.
DİN-də Daxili Qoşunların rəhbər heyətinin iştirakı ilə əməliyyat müşavirəsi keçirilib. Vilayət Eyvazov Prezident İlham Əliyevin təbriklərini və ən xoş arzularını şəxsi heyətə çatdırıb. O, ulu öndər Heydər Əliyevin ordu quruculuğu prosesində DİN-in Daxili Qoşunlarının təkmilləşməsinə böyük önəm verdiyini bildirib.
Nazir vurğulayıb ki, bu gün İlham Əliyevin diqqət və qayğısının, tələb və göstərişlərinin nəticəsi olaraq, Daxili Qoşunlar qarşısına qoyulan istənilən döyüş tapşırığını yüksək keyfiyyətlə yerinə yetirməyə qadirdir:
“Müzəffər Ali Baş Komandanın əmri ilə düşmən həmlələrinə qarşı keçirilən “Dəmir yumruq” əks-hücum əməliyyatlarında hərbi qulluqçularımız bunu bir daha təsdiq etdi. Daxili Qoşunların inkişafı üçün qəbul edilən qərarlar, dövlət başçısının imzaladığı müvafiq sərəncamları ilə daha 12 hərbi qulluqçunun dövlət mükafatları ilə təltif olunması şəxsi heyət tərəfindən minnətdarlıqla və ruh yüksəkliyi ilə qarşılanıb”.
![icon](/images/loading.png)