Dilçilik İnstitutu doğru variantı açıqladı

Son günlər sosial şəbəkələrdə “Xocəsən” qəsəbəsinin, eləcə də Bakı Metropoliteninin bu qəsəbədə yerləşən stansiyasının adının fərqli şəkildə yazılması müzakirə mövzusuna çevrilib.

Bu ziddiyyət bəzi dövlət qurumlarının müxtəlif vaxtlarda yaydığı məlumatlarda da öz əksini tapır. Belə ki, Binəqədi Rayon İcra Hakimiyyətinin saytında qəsəbənin adı həm “Xocasən”, həm də “Xocəsən”, Avtomobil Yolları Dövlət Agentliyinin və Bakı Nəqliyyat Agentliyinin saytlarında “Xocahəsən” olaraq yazılsa da, artıq son sənədlərdə qəsəbənin adı “Xocəsən” olaraq qeyd edilir.

“Bakı Metropoliteni” QSC-nin mətbuat katibi Bəxtiyar Məmmədov bildirib ki, hansısa stansiyaya ad verilməzdən əvvəl aidiyyəti qurumlara müraciət ünvanlanır. Sakinlərin sözlərinə görə, qəsəbənin adının yazılışındakı fərqlilik onları da çaş-baş salıb.

Yaranmış çaşqınlığa Azərbaycan Milli Elmlər Akademiyasının Dilçilik İnstitutundan da münasibət bildirilib. Qeyd edilib ki, toponimlərə xalqın səsləndirdiyi kimi yanaşmaq bu cür yanlışlıqlara səbəb ola bilər.