Ekspert: Hava limanını AZAL-dan ayırmaq lazımdır

Azərbaycanda aviabiletlərin qiymətlərinin region ölkələri ilə müqayisədə baha olması uzun illərdir müzakirə mövzusudur.

Xüsusilə də quru sərhədlərin bağlı olduğu hazırkı dövrdə yüksək qiymətlər əhalinin xaricə gediş-gəliş xərclərini artırmaqla yanaşı, ölkədə turizmin inkişafı üçün də əngəl yaradır.

Problemin ciddiliyini nəzərə alan deputatlar məsələni dəfələrlə parlamentdə də gündəmə gətiriblər. Milli Məclisin İnsan hüquqları komitəsinin sədri Zahid Oruc 2022-ci ilin noyabrındakı çıxışında AZAL-ın borcuna diqqət çəkərək onun dövlətin iqtisadi təhlükəsizliyini təhdid etdiyini bildirmişdi.

Qeyd etmək lazımdır ki, AZAL Prezident İlham Əliyevin 2021-ci ildə imzaladığı müvafiq Sərəncamla Azərbaycan İnvestisiya Holdinqinin idarəetməsinə verilib. Ölkə başçısının sentyabrın 1-də imzaladığı digər Sərəncam ilə isə Cahangir Əsgərov AZAL-ın prezidenti vəzifəsindən azad edilib. Quruma prezident təyin olunanadək həmin vəzifənin müvəqqəti icrası “Azərbaycan Hava Yolları” Qapalı Səhmdar Cəmiyyətinin birinci vitse-prezidenti Samir Rzayevə həvalə olunub.

Bəs rəhbərliyin dəyişməsi qurumun bundan sonrakı fəaliyyətinə necə təsir edəcək? AZAL-da hansı yeniliklər gözlənilir?

İqtisadçı Əkrəm Həsənov mövzu ilə bağlı bildirib ki, vətəndaşlar yeni rəhbərliyin gəlişi ilə aviabiletlərin qiymətlərinin enəcəyini gözləyirlər.

Ekspert qiymətlərin yüksək olmasının səbəbini də izah edib: “Azərbaycanda qiymətlərin yüksək olmasının əsas səbəbi odur ki, AZAL həm aviaşirkətdir, həm də hava limanını idarə edir. Əslində, belə olmalı deyil. Düşünürəm ki, hava limanını AZAL-dan ayırmaq lazımdır. Əks halda AZAL həmişə inhisarçı mövqeyindən sui-istifadəyə cəhd edəcək”.