“Erməni məhsullarını bu adla gətirirlər” | Bu məhsullar gizlicə Bakı bazarında satılır? - Baku TV

Sosial şəbəkələrdə “8-ci kilometr” bazarında Ermənistan istehsalı olan “Lori” pendirinin satılması ilə bağlı iddialar diqqət çəkib.

Belə ki, satıcılardan biri paylaşım edərək həmin məhsulun Gürcüstan mənşəli olduğunu bildirib.

Jurnalist İlhamə Nasir isə deyir ki, məhsulun üzərində nə Azərbaycan dilində məlumat var, nə də istehsalçı qeyd olunub:

“Məhsulun üzərində erməni dilində “Lori” pendiri yazılıb. Loru mahalı Qərbi Azərbaycanın tarixi bölgələrindən biridir. Hazırda həmin ərazidə ermənilər yaşadığı üçün məhsulun istehsalçısının da erməni şirkəti olduğu ehtimal edilir. Əksər insanlar erməni və gürcü əlifbalarını bir-birindən ayırd edə bilmir. Düşünürəm ki, satıcı da məhz bundan istifadə edir. Məhsulun ölkəyə qanuni idxal proseduru ilə gətirilib-gətirilmədiyi müəyyənləşdirilməlidir”.

Baku TV-nin mövzu ilə bağlı paytaxt sakinləri arasında keçirdiyi sorğu zamanı vətəndaşlar etiketsiz və mənşəyi bəlli olmayan qida məhsullarının satışına nəzarətin gücləndirilməsini tələb ediblər.

Məsələ ilə bağlı Azərbaycan Qida Təhlükəsizliyi Agentliyindən isə bildirilib ki, fakt araşdırılır və ictimaiyyətə əlavə məlumat veriləcək.