Evə silahlı basqın edib 3 nəfəri qətlə yetirən şəxs hakim qarşısında

Coratda evə silahlı basqın edərək üç nəfəri qətlə yetirməkdə təqsirləndirilən Müşfiq Tağıyevin cinayət işinin ilk məhkəmə hazırlıq iclası baş tutub.

Sumqayıt Ağır Cinayətlər Məhkəməsində hakim Hafiz Əliyevin sədrliyi ilə keçirilən posesdə təqsirləndirilən şəxsin anket məlumatları dəqiqləşdirilib.

Məhkəmə Cinayət Məcəlləsinin bir neçə ağır maddəsi ilə ittiham olunan Müşfiq Tağıyev barəsində seçilmiş həbs qətiimkan tədbirinin dəyişdirilmədən işin məhkəmə araşdırmasına verilməsi üçün qərar qəbul edib.

Növbəti məhkəmə baxış iclası iyulun 24-nə təyin edilib.

Qeyd edək ki, hadisə 2023-cü il oktyabrın 28-də saat 5-6 radələrində Sumqayıtın Corat bağları yaşayış massivində törədilib. Qəsəbədəki fərdi yaşayış evlərindən birində odlu silahdan açılan atəş nəticəsində iki nəfər – Susana Karakaş və Dağbəyi Fərəcov qətlə yetirilib. İnsident zamanı Tərlan Fərəcov, Serkan Karakaş, daha sonra isə hadisə yerinə gələn qonşular – Etibar Sarıyev və Mehman Sarıyev xəsarət alıblar. Sonradan yaralılardan biri – Serkan Karakaş müalicə üçün Türkiyəyə aparılsa da, orada xəstəxanada ölüb. Polisin keçirdiyi əməliyyat zamanı hadisəni törətməkdə şübhəli bilinən Corat qəsəbə sakini, 1987-ci il təvəllüdlü Müşfiq Tağıyev saxlanılaraq istintaqa cəlb olunub. Onun barəsində Cinayət Məcəlləsinin bir neçə ağır maddəsi ilə ittiham irəli sürülüb.