Evlərimizin altı sudur, qoxudan dayanmaq olmur! - Atyalı sakinlərinin yol problemi

Abşeron rayonu, Atyalı qəsəbəsinin yolları acınacaqlı vəziyyətdədir.

Sakinlərin sözlərinə görə, yollar 20 ildən çoxdur ki, asfalt üzünə həsrətdir. Həmçinin qəsəbənin bəzi hissələrində su xətti çəkilərkən yol infrastrukturu dağıdılıb və bir daha bərpa olunmayıb.

Qəsəbədə həmçinin antisanitar vəziyyət hökm sürür. Zibil qutuları vaxtında təmizlənmədiyi üçün ətraf məişət tullantıları ilə doludur. Üfunət qoxusundan dayanmaq belə mümkün deyil.

“Burada ən azı 4 mindən çox əhali yaşayır. Bu qədər əhali yaşamasına baxmayaraq, yola nəzarət edən yoxdur. Zülm çəkirik, qışda uşaq məktəbə gedə bilmir. Kanalizasiya yoxdur. Şambo quyulardır, o da dolur, hamının evinin altı sudur. Zibil qutuları yoxdur, hər yer zibildir, kim hara gəldi tullayır”, – qəsəbə sakini narazılığını bildirib.

Məsələ ilə bağlı Hökməli bələdiyyəsindən bildirilib ki, onlar tərəfindən yaşayış massivinin daxili torpaq yollarına çınqıl tökülüb. Qəsəbənin küçələrinə asfalt örtüyünün salınması maliyyə baxımından mümkünsüzdür.

Əraziyə kanalizasiya xəttinin çəkilməsi ilə bağlı İri Şəhərlərin Birləşmiş Su Təchizatı Xidmətinə rəsmi müraciət də etdiklərini bildiriblər. Məişət tullantıları ilə bağlı isə daşınmanı edən şirkətlə müqaviləyə xitam verilib. Bələdiyyə əraziyə yeni daşıma şirkətinin cəlb olunacağını vəd edib.

İri Şəhərlərin Birləşmiş Su Təchizatı Xidmətinin mətbuat xidmətindən verilən məlumata görə isə qəsəbənin bir küçəsində su xəttinin təmir-bərpası məqsədilə işlər görülür. Xəttin təmiri yekunlaşdıqdan sonra qazılan xəndək yol səviyyəsində torpaqla doldurulacaq. Kanalizasiya təchizatı ilə bağlı isə layihə sənədləri hazırlanıb.