Gəncədə nadir ağaclar kəsildi | Təbiətə bu qədər ziyan dəydi - Baku TV

Gəncə şəhərində ağacların kütləvi kəsilməsi faktı qeydə alınıb.

Ekologiya və Təbii Sərvətlər Nazirliyinin yerli qurumları tərəfindən aparılan araşdırmalar zamanı Atatürk prospekti, 35 ünvanında yerləşən şəxsi mülkiyyətə aid torpaq sahəsində 7 ağacın kəsildiyi müəyyən edilib. Kəsilən ağaclar arasında nadir növlərdən olan Eldar şamları da var. Faktla bağlı qanunvericiliyə uyğun tədbirlərə başlanılıb.

Məsələ ilə bağlı açıqlama verən sahibkar Nofəl Hacıyev bildirib ki, sözügedən ərazi onun şəxsi mülkiyyətidir. Onun sözlərinə görə, ağacların kəsilməsi və cərimənin yazılması prosesində iştirak etməyib və bu barədə məlumatı olmayıb:

“5 il ərzində su olmadığı üçün ağaclara qulluq və suvarma aparılmayıb. Onları mən kəsməmişəm. Sözügedən cərimənin mənə heç bir aidiyyəti yoxdur”.

Ekologiya və Təbii Sərvətlər Nazirliyindən isə qeyd olunub ki, 10 saylı Regional Ekologiya və Təbii Sərvətlər İdarəsinin əməkdaşları tərəfindən keçirilən növbəti nəzarət tədbirləri zamanı sözügedən ünvanda ağacların kəsilməsi faktı aşkar olunub. Araşdırma zamanı həmin ərazidə vətəndaş Afiyyət Bayramovaya məxsus torpaq sahəsində 7 ədəd şam və tut ağacının kəsildiyi müəyyən edilib. Nəticədə, təbiətə 19 050 manat məbləğində ziyan dəyib.

Nazirliyin məlumatına görə, dəymiş ziyanın məbləği cinayət tərkibi yaratdığından toplanmış materiallar hüquqi qiymət verilməsi üçün hüquq-mühafizə orqanlarına göndərilib. Eyni zamanda kəsilən ağacların yerinə yenilərinin əkilməsi məqsədilə Gəncə Şəhər İcra Hakimiyyətinə müraciət olunub və yanvarın 29-da həmin əraziyə yeni ağaclar əkilib.