Gəncənin 21 yaşlı ilk mülki şəhidi | "Raket düşəndə hiss etdim ki, ona nə isə oldu" - Baku TV

Gəncənin Şəhidlər xiyabanında 600 nəfərə yaxın Vətən fədaisi uyuyur. Onlardan 480-i Birinci Qarabağ müharibəsinin, qalanları isə Vətən müharibəsinin şəhidləridir.

Müharibə zamanı Gəncəyə endirilən raket zərbələri nəticəsində şəhid olan 26 nəfərdən bir qismi də burada dəfn edilib.

Gəncənin ilk mülki şəhidi Tunar Əliyevin anası Validə Əliyeva müharibədən ötən altı il ərzində oğlunun məzarını heç vaxt tək qoymayıb.

“Səhər tezdən Tunar evdən əsgərlərə yardım aparmaq məqsədilə öz maşını ilə çıxdı. Üstündən təxminən 10 dəqiqə keçmişdi, möhkəm bir gurultu səsi gəldi. Mən qışqırdım ki, ermənilər Gəncəni vurdu. Dedim, oğluma nəsə oldu. Nə qədər zəng vururdum, Tunar telefonunu götürmürdü. Saat 3 radələrində oğlumun nəşi 3 nömrəli xəstəxananın morqunda idi.

Tunar öz arzusuna vaxtından əvvəl çatdı. Hər gün iş yerindən zəng edib deyirdi ki, hərbi komissarlıq məni çağırmadı. Elə bil tələsirdi. Mən deyirdim ki, sən niyə belə tələsirsən, ay bala? Deyirdi ki, oraya gedən oğlanlardan niyə geri qalmalıyam? Özü də elə bil əvvəlcədən hiss etmişdi ki, şəhid olacaq. Dostlarına tapşırıqlar vermişdi. Üzüyünü, saatını, qolbağını onlara hədiyyə etmişdi ki, məni yadınızda saxlayarsınız. Deyirdi, mən bilirəm ki, şəhid olacağam”, – şəhidin anası Validə Əliyeva bildirib.