Gömrükdə diplomlarla bağlı araşdırma başlanılıb?

Dövlət Gömrük Komitəsində diplomlarla bağlı araşdırma aparılır.

Bəzi informasiya mənbələrinin yaydığı məlumata görə, Dövlət Gömrük Komitəsində çalışan xeyli sayda vəzifəli və rütbəli şəxsin diplomunun təsdiqlənməməsi faktı aşkarlanıb. Komitə sədrinin birinci müavini, sədr vəzifəsini müvəqqəti icra edən gömrük xidməti general-leytenantı Şahin Bağırov məsələ ilə bağlı araşdırmaların başlanmasına göstəriş verib. Artıq ilkin nəticələr də məlum olub.

O da aydın olub ki, DGK-nın bəzi rütbəli şəxsləri xarici ölkələrdəki ali məktəblərə adlarını yazdırsa da, həmin ölkələrə getmədən "təhsil” alıblar. Həmin şəxslər işdən azad olunur və bəzinin barəsində isə araşdırma aparılır.

Məsələ ilə bağlı DGK-nin sözçüsü Natiq Axundov Baku TV-yə açıqlama verib.

Onun sözlərinə görə, bir sıra kütləvi informasiya vasitələrində Dövlət Gömrük Komitəsinin rəhbərliyi tərəfindən əməkdaşların diplomlarının araşdırılması ilə bağlı xüsusi göstəriş verildiyinə və xeyli sayda şəxsin diplomunun təsdiqlənməməsinə dair yayılan məlumatlar həqiqətəuyğun deyil. Bildiririk ki, işə qəbul zamanı, həmçinin gömrük orqanlarında xidmət dövrlərində mütəmadi olaraq insan resurslarının idarə edilməsi ilə bağlı sənədlərin öyrənilməsi həyata keçirilir və qanunazidd hallar aşkar edildikdə müvafiq tədbirlər görülür.