Hamiləliyi dərmanla sonlandırmağın faciəvi sonu | “Qız istəmirlər deyə edirlər, amma...”

Hamiləliyi özbaşına sonlandırma istəyi bəzi qadınların həyatını itirməsinə səbəb olur. İstər arzuolunmaz hamiləlik, istərsə də qız uşağına hamiləlik hallarında bu, ən birinci seçim olur.

Hazırda Azərbaycan abortların əhali sayına nisbətinə görə dünyada ilk pillələrdə qərarlaşıb. Statistika nə qədər ürək ağrıdırsa, bir o qədər də ikrah doğurur.

Həkimlər düşünürlər ki, dərmanla abort etməyə çalışan qadınlar öz həyatlarını da nə dərəcədə təhlükəyə atdıqlarının fərqində deyillər.

Ginekoloq Fidan Əliyevanın sözlərinə görə, bu növ dərmanların apteklərdə reseptsiz satılması qadağandır. Çünki bu dərmanların yanlış istifadəsi ciddi təhlükələrə gətirib çıxara bilər.

“Qadınlar hamilə olduqlarından şübhələndikləri an həkimə getmədən birbaşa apteklərə müraciət edirlər. Bəzi hallarda bu, uğurlu alınır, amma bəzən qadını həyati təhlükə ilə üz-üzə qoyur. Elə qanaxmalar olub ki, qadını xəstəxanaya çatdırmaq mümkün olmayıb”, ‒ deyə F.Əliyeva bildirib.

Ginekoloq Leyla Sadıqlı isə deyir ki, qadınlar hamiləliyin 12-ci həftəsinə kimi öz istəkləri ilə abort etdirə bilərlər. Lakin bu müddətdən sonra həyata keçirilən abortlar gecikmiş hesab olunur və qadın sağlamlığı üçün risklər daşıyır:

“Hamiləliyin 12-ci həftəsində ultrasəs müayinə zamanı dölün cinsiyyətinin qız olduğunu biləndə qadınlar aborta müraciət edirlər. Lakin gec həyata keçirilən abortlar zamanı qadında infeksiya, qanaxma, qadınlığın deşilməsi və ikincil sonsuzluq yarana bilər”.

Həkimlər hesab edirlər ki, bu cür nəticələr xanımların hamiləlikdən qorunmağa düzgün yanaşmamasıdır. Bunun üçün ən populyar növ spiral sayılır. Bundan başqa, dərialtı implantdan və hətta həblərdən istifadə edilir. Heç bir qorunma üsulundan istifadə etməyən qadınlar tez-tez hamilə qalırlar. Abort isə orqanizmdə çox sayda fəsadlar törədir. Bunu qadın həmin anda, yaxud bir ay, hətta illər sonra da hiss edə, yaşaya bilər.