Həkimlərin əməkhaqları nə qədər olacaq? | Tibb işçilərinin maaşında yenilik - Baku TV

Ailə və sahə həkimlərinin əməkhaqqısı 74 % artırılaraq 1150 manatdan 2000 manata çatdırılıb.

Bunu TƏBİB-in (Tibbi Ərazi Bölmələrini İdarəetmə Birliyi) icraçı direktoru Anar Bayramov mətbuat konfransında deyib.

O bildirib ki, tibb mərkəzlərinin təcili tibbi yardım və qəbul şöbələrinin həkimlərinin əməkhaqqısı 1550 manatdan 2500 manatadək artırılıb. Burada artım 61 % təşkil edib:

“Anestezioloq və reanimatoloqların əməkhaqqısı 1450 manatdan 3000 manatadək, yəni 107 % artırılıb. Regionlarda çalışan uşaq anestezioloq-reanimatoloqların da əməkhaqqısı 3000 manatadək çatdırılıb. Neonatoloqların əməkhaqqısı 1450 manatdan 2400 manata, hemodializ həkimlərinin əməkhaqqısı isə 1450 manatdan 2250 manata artırılıb.

Regionlarda həkim çatışmazlığı nəzərə alınaraq akuşer-ginekoloq, neyrocərrah, uşaq cərrahı, ürək-damar cərrahı, çənə cərrahiyyəsi və travmatoloqların əməkhaqqısı 48 % artırılaraq 2150 manata çatdırılıb.

İslahat təcili tibbi yardım xidmətində çalışan digər əməkdaşları da əhatə edib. Təcili yardım həkimlərinin əməkhaqqısı 1550 manatdan 2200 manata, stansiya müdirlərinin əməkhaqqısı isə 1750 manatdan 2700 manata yüksəldilib. Təcili yardım tibb bacılarının əməkhaqqısı 1210 manata, feldşerlərin əməkhaqqısı isə 1100 manatdan 1810 manata çatdırılıb”.