Hüseyn Həsənov od püskürdü | Əgər kimsə haqqımda danışıb, nəsə yazırsa…

Rusiyada məşhurlaşan azərbaycanlı bloger Hüseyn Həsənov külli miqdarda vergi borcu olması haqda sualları cavablandırıb.

Bir müddət əvvəl Hüseynin Rusiya vergi orqanlarına 153 milyon rubl (təxminən 3 milyon manat) borcu olması haqda xəbərlər dərc edilib. Buna görə də vergi orqanları onun Moskvadakı bahalı mənzilini və avtomobillərini əlindən almağa çalışır.

İzləyicilərindən biri blogerə "Səni xəbərlərdə izləyirik. Nə vaxt danışacaqsan?" sualını ünvanlayıb.

H.Həsənov yazılanlara "Əgər kimsə nəsə danışır və ya yazırsa, bu onun hər zaman düzgün olduğuna dəlalət etmir. Hər şey yaxşıdır" reaksiyasını verib.

Bloger "Nəyə görə Azərbaycana köçdünüz" sualına isə "Heç yerə köçməmişəm. İstədiyim yerdə və istədiyim vaxt yaşayıram. Bakıdakı tətildən və buradakı həyatdan həzz alıram. Hər zaman səyahət edirəm və dünya adamıyam. Mənim üç əsas yaşadığım şəhər var: Bakı, Moskva və Dubay. Hər yerdə də bütün işlərim düz yoldadır" cavabını verib.

Bloger qadınlarla və şəxsi həyatı ilə bağlı sualı da cavabsız qoymayaraq bunları yazıb:

"Hələ ki subayam. Yəni mən nə evli, nə də hansısa bir xanımla münasibətdəyəm. Kimlə istəsəm, istədiyim vaxt və istədiyim qədər ünsiyyət qururam. İstənilən yerdə də tanış oluram. Məni necə istəyirsinizsə, elə də adlandırın. Heç vecimə də deyil.

Yeri gəlmişkən, aldatmağa qəti şəkildə qarşı olan kişilərin kiçik faizinə aidəm. Heç vaxt özümünkünü aldatmayacağam. Mən yalnız bir insanı sevə bilirəm".