İcbari Tibbi Sığorta üzrə Dövlət Agentliyindən açıqlama

İcbari tibbi sığortanın Xidmətlər Zərfi ilə hamilə qadınların profilaktik müayinələri, ambulator və stasionar şəraitdə onlara göstərilən tibbi xidmətlər təminatına alınıb.

İcbari Tibbi Sığorta üzrə Dövlət Agentliyindən bildirilib ki, hamiləliyin fizioloji gedişi zamanı hamilə qadının tibb müəssisəsinə 7 gəlişi tövsiyə olunur. Xidmətlər Zərfi ilə hamilə qadına arterial təzyiqin ölçülməsi, nəbzin sayılması, bədən kütləsi indeksinin, qanda şəkərin, qan qrupu, qanın kliniki analizi kimi tibbi xidmətlər göstərilir. Həmçinin hepatit B və C, sifilis testləri, skrininq testi, uşaqlıq yolundan yaxmanın mikroskopik müayinəsi icbari tibbi sığorta ilə qarşılanır:

“Tibb müəssisəsində hamiləliyin 12-ci həftəsinə qədər fol turşusunun təyini, ultrasəs və doppler müayinələri, dölün ürək döyüntülərinə qulaq asılması və digər müayinələr də həyata keçirilir.

Doğuş və klassik qeysəriyyə kəsiyi əməliyyatı, stasionar yatış zamanı dərman, tibbi sərf və qidalanma, laborator və instrumental müayinə, habelə vaxtından əvvəl doğulmuş körpələrin küvezdə saxlanılması icbari tibbi sığorta çərçivəsində ödənişsiz qarşılanır. Klassik qeysəriyyə kəsiyi əməliyyatı tibbi göstəriş əsasında həyata keçirilir.

Dölün diaqnostik dəyərləndirilməsi, daun sindromuna görə qan nümunəsində hormonların təyini Xidmətlər Zərfi ilə təminata alınır”.

Həmçinin doğuşdan sonrakı dövrdə zahı qadınların müayinə və müalicəsi, yenidoğulmuşların müşahidəsinin aparılması və ana südü ilə qidalanmaya dair məsləhətlərin verilməsi də ödənişsiz göstərilir.