İnsult zamanı ilk yardım qaydaları hansılardır?

"Ətrafdakıların köməyi insult keçirən insanın həyatını xilas edə və onun sonrakı reabilitasiyasını asanlaşdıra bilər".

Bunu Rusiyalı nevroloq Qalina Çudinskaya yerli mediaya bildirib.

Onun sözlərinə görə, "İnsultu üz, nitq, əl ilə tanı" metodikası insultu tanımağa kömək edir: "Əgər insan rahat gülümsəyə bilmirsə, hər iki əlini qaldırmağa cəhd edərkən bir əli aşağı düşürsə və ya nitqi anlaşılmaz olursa, dərhal hərəkət etmək lazımdır".

Həkim bu əlamətlərdən heç olmasa birinin müşahidə olunacağı təqdirdə dərhal təcili yardım çağırmağı və əlamətlərin dəqiq başlama vaxtını mütləq yadda saxlamağı tövsiyə edib. Bu, həkimlərə düzgün terapiya seçməyə kömək edəcək, çünki tromboliz yalnız ilk 4,5 saat ərzində effektivdir.

O vurğulayıb ki, təcili yardım gəlməmişdən əvvəl insan təhlükəsiz vəziyyətdə uzadılmalıdır: "Əgər o, ayıq vəziyyətdədirsə, başı qaldırılmış vəziyyətdə arxası üstə, əgər deyilsə, qusma zamanı boğulmaması üçün böyrü üstə uzadılmalıdır. Həmçinin yaxası açılmalı, hava axını təmin edilməli, nəfəs alması və nəbzi daim nəzarətdə saxlanılmalıdır".

"İnsult şübhəsi olan insana heç bir halda su, yemək və ya dərman, spirtli içkilər, qəhvə və enerji içkiləri verilməməlidir. Çünki bu, vəziyyəti pisləşdirə bilər", – deyə nevroloq bildirib.

Çudinskaya əlavə edib ki, iflic olmuş ətraf orqanları masaj etmək və ya ovuşdurmaq olmaz. Onun sözlərinə görə, bu, qan axınını yaxşılaşdırmır, əksinə, travmaya səbəb ola bilər.