Kişilərdə sümük ağrıları varsa… | Türkiyəli uroloqdan xəbərdarlıq

Ailəsində prostat xərçəngi olan 40 yaşdan yuxarı kişilər mütləq şəkildə müayinədən keçməlidir.

Bunu türkiyəli uroloq Bülent Akduman bildirib.

O, heç bir əlamət olmasa belə, mütəmadi yoxlanışın önəmli olduğunu qeyd edib.

Hər 6 kişidən 1-nin prostat xərçəngi riski daşıdığını bildirən mütəxəssis gecə tez-tez sidiyə qalxma, sümük ağrıları və böyrək funksiyalarında pozulmanın mümkün əlamətlərdən olduğunu bildirib. Erkən mərhələdə diaqnoz qoyularsa, müalicə tam mümkündür.

Prostat xərçəngi 50 yaşdan yuxarı kişilər arasında ən çox rast gəlinən xərçəng növüdür və ağciyər xərçəngindən sonra ikinci ən ölümcül xərçəng hesab olunur.

Diaqnoz üçün əvvəlcə PSA adlı qan testi aparılır, sonra isə prostat müayinəsi edilir. B.Akduman müayinənin sadə və ağrısız olduğunu, qorxmadan müraciət etməyin vacib olduğunu qeyd edib.