Komitə sədri Bərdədə baş vermiş dəhşətli hadisəyə münasibət bildirdi | Bu elə bir cinayətdir ki…

“Azyaşlı, yeniyetmə qızlara təzyiqlə müşayiət olunan belə hadisələrə cəmiyyət imkan verməməlidir”.

Bu sözləri Ailə, Qadın və Uşaq Problemləri üzrə Dövlət Komitəsinin sədri Bahar Muradova Bərdədə 15 yaşlı qıza qarşı baş vermiş zorakılıq hadisəsi ilə bağlı jurnalistlərə açıqlamasında deyib.

“Heç kəs bununla barışmamalıdır. Harada yaşamasından asılı olmayaraq baş verən belə hadisəyə qarşı öz münasibətimizi bildirməliyik. Bu, ilk növbədə bir cinayət hadisəsidir. Müvafiq hüquq-mühafizə orqanları bununla məşğuldurlar.

Bu, elə bir cinayətdir ki, bununla müxtəlif qurumlar, hərə öz fəaliyyəti istiqamətində məşğul olur. Zorakılığı məruz qalmış şəxsin özü əgər həyatını itirməyibsə, onun psixoloji durumu ilə, üzvü olduğu ailədəki vəziyyətlə, onun bütün hüquqlarının aidiyyəti qurumlar tərəfindən tam və hərtərəfli təmin olunması prosesi ilə məşğul oluruq. Biz də bu işin içərisindəyik. Mən inanıram ki, bu kimi hadisələrə yol verənlər heç vaxt cəzasız qalmayacaq və qalmır da”, – komitə sədri bildirib.