Mayda kim nə istəyir, etsin | Sakinlər inanclarımıza kök salan adətlərdən danışdı

Elimizin toy kimi bir adəti var. İki nəfərin taleyini birləşdirdiyi, yaxınların, doğmaların da bu xoş günün ətrafında toplaşdığı bir ənənə. Bəzən valideynlər övladlarının xeyir işinə hazırlıq mərhələsində xeyli xırda detallara xüsusi məna yükləyirlər. Elə götürək mayda toy etməkdən çəkinənləri, onu ağır ay hesab edənləri.

Baku TV-nin mövzu ilə bağlı paytaxt sakinləri arasında keçirdiyi sorğu zamanı vətəndaşlar may ayında toy etməkdə problem görmədiklərini qeyd ediblər.

“Bizim adətlərimizdə belə şey yoxdur. Mayda kim nə istəyir, etsin”, – sakinlərdən biri etirazını bildirib.

Məgər may doğrudan da xeyir iş üçün ağır aydır?

Azərbaycan Milli Elmlər Akademiyası Folklor İnstitutunun direktor müavini Afaq Xürrəmqızı qeyd edib ki, bu inanc digər xalqlarda olub, onların təsiri ilə bizim folklorumuza da keçib:

“Slavyan xalqlarında mayda toy etməməklə bağlı qatı inanc var. Onlar deyirlər ki, bu ayda toy edənlər ömrünün sonuna qədər əziyyətdə qalar”.