Məktəblərin dərs yükü problem yaratdı: valideynlər və şagirdlər bu məsələdən şikayətçidir

Əksər valideynlər və şagirdlər yay tətilindən sonra məktəbə adaptasiyanın çətin olduğunu bildirirlər.

Bəs tədris ilinə tez uyğunlaşmaq üçün nə etmək lazımdır?

Psixoloq Gülnar Orucova məsələ ilə bağlı bildirib ki, Azərbaycanda ilk gündən dərslərin çox olması şagirdlərin məktəbə uyğunlaşmasında çətinlik yaradır: “Uşaqların daha çox maraq dairələrindən çıxış etmək lazımdır. Bir həftə və ya on gün sonra dərsə başlanılması tədrisi daha da uğurlu edə bilər. Müəllimlər hər şagirdə xüsusi yanaşmalıdırlar”.

Müəllimə Elnarə Qurbanzadə isə qeyd edib ki, şagirdlərin məktəbə uyğunlaşması üçün müəllimlərlə yanaşı, valideynlər də cavabdehlik daşıyırlar: “Valideynlər övladlarının fiziki cəhətdən hazırlığına diqqət yetirməlidirlər. Onların erkən saatlarda yatmaları və oyanmaları üçün müəyyən şəraitə hazır olmalıdırlar”.

Göründüyü kimi, bu məsələdə də əsas məsuliyyət valideyn və müəllimlərin üzərinə düşür. Onlar bu çətin dövrdə şagirdlərə dəstək olmalıdırlar.