Millət vəkili Vahid Əhmədovun fikirlərinə təəssüfləndi

“Vahid Əhmədov müsahibəsində Azərbaycanda gedən dinc quruculuq, bərpa proseslərindən, sosial müdafiənin gücləndirilməsindən, torpaqlarımızın işğaldan azad olunmasından danışmaq əvəzinə, başqa fikirlər irəli sürür. Bu fikirlər qəbuledilməzdir”.

Bunu Milli Məclisin plenar iclasında deputat Mahir Abbaszadə deyib. Azərbaycanda siyasi partiyaların fəaliyyəti məsələsinə toxunan millət vəkili bildirib ki, 1992-ci ildə AXCP-nin hakimiyyət uğrunda apardığı mübarizə Şuşanın, Laçının işğalı ilə nəticələnib. AXCP 1993-cü ildə hakimiyyətdə olduğu müddətdə Kəlbəcər kimi strateji əhəmiyyəti olan rayon işğal altına düşüb.

“1992-ci ildə ulu öndər Heydər Əliyevin rəhbərliyi ilə YAP-ın yaradılması, bu partiyanın siyasi xəttinə sadiq olan Prezident İlham Əliyevin rəhbərliyi ilə 44 günlük Vətən müharibəsində torpaqlarımız işğaldan azad olundu, Laçın, Kəlbəcər bir güllə atılmadan geri qaytarıldı”, – deyə o qeyd edib.