Nə qədər pozitiv danışsaq da… | Fazil Mustafa səfərbərlik üçün səsləndi

“İnkişaf etmiş dövlətlərin hamısının tarixində təhsil səfərbərliyi olub. Qazandığımız qələbələrdən sonra təhsil səfərbərliyi keçirməliyik”.

Bu sözləri Milli Məclisin bu gün keçirilən sonuncu plenar iclasında deputat Fazil Mustafa deyib.

Deputat bildirib ki, Dövlət İmtahan Mərkəzinin verdiyi statistik rəqəmə görə, təhsil-tədris predmetini mənimsəmə faizi orta statistik abituriyentin 29-43 faizini əhatə edir:

“İnkişaf etmiş ölkələrdə bu göstərici 70 faizə yaxındır. Təhsilimizin vəziyyəti bu faktdan kifayət qədər görünür. Sertifikasiya keçirilir, müəllimlərin müəyyən dərəcədə çeşidlənməsi baş verir, amma sanki bu ölkədə saxta diplom alan yalnız müəllimlərdir. Zəif bənd kimi müəllimlər tapılıb. Müəllimlərin sosial vəziyyəti ilə maraqlansaq görərik ki, bir çox müəllimin imtahana hazırlaşmaq imkanı yoxdur. Sertifikasiya imtahanlarının keçirilməsində xeyli qeyri-müəyyənliklər var.

Belə ki, 0-dan 29-a qədər təkmilləşməyə ehtiyacı olanlar, 30-dan 50-yə qədər isə qənaətbəxş olanlar götürülür. 30-50 arasında böyük məsafə var. Burada dəyişiklik olmalı, 40-dan 50-yə qədər bal toplayanlara 20 faiz əməkhaqqının artırılması tətbiq edilməlidir”.