Tonlarla narkotik dövriyyədən çıxarıldı | Araz Məmmədov detalları açıqladı

“2017-ci ildən hazırkı dövrədək dövlət sərhədlərinin etibarlı mühafizəsinin təşkili zamanı görülmüş təxirəsalınmaz əməliyyat tədbirləri və sərhəd naryadlarının ayıq-sayıqlığı nəticəsində 1636 nəfər sərhəd pozucusu, 1021 nəfər rejim pozucusu saxlanılaraq müvafiq dövlət orqanlarına təhvil verilib”.

Bu sözləri Dövlət Sərhəd Xidməti (DSX) rəisinin müavini – Sərhəd Qoşunlarının komandanı, general-leytenant Araz Məmmədov Sərhəd Qoşunları Komandanlığının “Şəmkir” sərhəd dəstəsində keçirilən mətbuat konfransında deyib.

O bildirib ki, qarşılıqlı əlaqədə olaraq qaçaqmal və narkotik vasitələrin qeyri-qanuni dövriyyəsi ilə mübarizə çərçivəsində həyata keçirilmiş tədbirlər nəticəsində aşkarlanaraq götürülmüş narkotik vasitələrin qeyri-qanuni dövriyyəsinə qarşı mübarizə çərçivəsində ümumi çəkisi 6 ton 928 kiloqram narkotik vasitə və 533 406 psixotrop həb aşkar edilərək qanunsuz dövriyyədən çıxarılıb. Saxlanılan narkotik vasitələrin ümumi təxmini dəyəri 162 milyon manat təşkil edib.

DSX rəisinin müavini həmçinin vurğulayıb ki, DSX Sərhəd Qoşunlarının sərhəd zastavalarında yaradılmış müasir tələblərə cavab verən texniki imkanların artırılması nəticəsində 2024-cü ildə dövlət sərhədlərinin etibarlı mühafizəsinin təşkili zamanı 301 sərhəd pozucusu, 134 rejim pozucusu saxlanılıb. Eyni zamanda ümumi çəkisi 1 ton 148 kiloqram narkotik vasitə və 30 038 psixotrop həb aşkarlanaraq qeyri-qanuni dövriyyədən çıxarılıb, ümumi dəyəri 13 milyon manatdan çox təşkil edib.