Ortaaylıq əməkhaqqında artım olub, yoxsa…? | İqtisadçıdan vacib açıqlama

Azərbaycan qanunvericiliyinə görə, hər ilin əvvəlində bütün növ əmək pensiyaları ölkə başçısının müvafiq Sərəncamı ilə əvvəlki il üzrə ortaaylıq əməkhaqqının illik artımına uyğun qaldırılır. Yəni əvvəlki il maaşlar orta hesabla nə qədər artıbsa, növbəti ildə pensiyaların məbləği həmin səviyyədə qaldırılır.

Lakin Dövlət Statistika Komitəsinin məlumatına görə, yanvar-aprel aylarında ortaaylıq əməkhaqqı 10,2 faiz artsa da, 6 aydan sonra bu göstərici 7,8 faizə enib. Halbuki əvvəlki illərdə proses əksinə olub. Yəni ortaaylıq əməkhaqqının artım göstəricisi ilin sonuna doğru yüksəlirdi.

İqtisadçı Eyyub Kərimli isə hesab edir ki, pensiyalarda artım daha çox olacaq:

“Düşünürəm ki, ilin sonuna qədər bu göstərici yüksələ bilər. Ümumilikdə isə 2025-ci ildə pensiya artımı 10 faiz civarında nəzərdə tutula bilər”.

Qeyd edək ki, 2024-cü il üzrə ortaaylıq əməkhaqqının 990 manat olacağı proqnozlaşdırılıb. Bu da maaşların əvvəlki illə müqayisədə cəmi 6 faiz artacağının gözlənildiyi deməkdir.