Övladını zibilliyə atan ananın qayınata və qayınanası danışdı

İyulun 17-i 15 günlük körpəsini zibil qutusuna atan Səbinə Qasımova ilə bağlı ətraflı məlumat əldə etmək üçün Baku TV-nin əməkdaşları qadının qeydiyyatda olduğu ünvana üz tutub.

Məlum olub ki, bu ünvanda Səbinə Qasımovanın keçmiş qayınatası və qayınanası yaşayır.

Onlar şifahi olaraq bildiriblər ki, 31 yaşlı Səbinə Qasımova 11 il onların gəlini olub. Bu izdivacdan bir oğul nəvələri olub. Səbinə onların oğlundan boşandıqdan sonra övladını da götürərək ata evinə gedib.

Təəccüb doğuran məqam ondan ibarətdir ki, qayınana Səbinənin övladına gözü kimi baxdığını, ondan çox razı olduğunu deyir. Hətta ananın körpəsini zibilliyə atdığını əks etdirən kadrlara baxdığını, həmin qadının onun gəlini olmadığını isrararla sübut etməyə çalışıb. Üstəlik, bildirib ki, keçmiş gəlini hicablıdır, kadrlarda görünən qadın isə başı açıqdır.

Qeyd edək ki, qayınana və qayınata keçmiş gəlinlərinin heç bir psixoloji probleminin olmadığını da bildirib. “Əks halda nəvəmizi ona verməzdik”, – deyə əlavə ediblər.