Paytaxtda mikromobilliyi inkişaf etdirmək üçün yeni addımlar atıldı | AYNA-dan açıqlama

Şəhərlərdə qısa məsafəni qət etmək üçün ən yaxşı üsul mikromobillik vasitələrindən istifadə etməkdir. İnsanların rahatlığını təmin etmək məqsədilə, eyni zamanda son dövrlərdə paytaxtın insan yönümlü şəhərə çevrilməsi istiqamətində aparılan addımlar çərçivəsində Bakı şəhərində mikromobillik zolaqları təşkil olunub.

Bu vaxta qədər 31 küçə və prospektdə velosiped zolaqları salınıb və onların 100 kilometrə çatdırılması nəzərdə tutulub.

Azərbaycan Yerüstü Nəqliyyat Agentliyinin rəsmisi Tural Orucov bildirib ki, şəhərdə mövcud olan işıqfor dirəklərində velosiped bölmələrinin yaradılması istiqamətində işlər davam etdirilir. Əlçatanlığın təmin edilməsi məqsədilə panduslar quraşdırılır:

“Şəhərin müxtəlif ərazilərində, əsasən iri ticarət mərkəzləri, ali təhsil ocaqları, metro stansiyaların qarşısında parklama məntəqələri yaradılıb ki, burada vətəndaşlar həm skuterləri, həm də velosipedləri kirayələyərək yaxın məsafəyə olan səfərlərini reallaşdıra bilsinlər”.