Qış fəslində gec oyanmağımızın səbəbi bu imiş | Rusiyalı müəllimdən məsləhət

Qışda gecə ikən yerini isidib yatanlar səhər vaxtında oyana bilmirlər.

Rusiya Səhiyyə Nazirliyinin Piroqov Universitetinin Əczaçılıq və Dərman Kimyası İnstitutunun Farmakologiya kafedrasının baş müəllimi Andrey Kondraxin qışda daha asan oyanmağın yolları barədə danışıb.

Onun sözlərinə görə, oyanmaq kortizoldan, yatmaq isə melotinindən asılıdır. Melatonin ifrazı qaranlıqdan qısa müddət sonra artır, gün işığında isə kortizol çoxalır.

“Lakin insan lampanı icad edəndən sonra vəziyyət dəyişib. Çünki süni işıqları yandırmaqla sirkadiyalı saatımız dəyişir, ritm pozulur”, – deyə ekspert bildirib.

Onun sözlərinə görə, qışda çöldə qaranlıq olduğundan insanlar yaxşı yuxuya gedib, rahat yatsalar da, günəş gec çıxdığına görə oyanmaqda problem yaşayırlar.

Mütəxəssis qeyd edib ki, səhər saatlarında kortizol istehsal etmək üçün işığı yandırmaq lazımdır. Hətta televizor da oyatmağa qadirdir:

“Günəş spektrinə malik xüsusi zəngli saatlar var ki, onlar işıq verir və bədənimizi kortizol istehsalını stimullaşdırmaq üçün aldadır. Radiolu zəngli saatlar da asan oyanmağınıza kömək edə bilər. İnsan səs eşitdikdə beyin məlumatı həzm etməyə başlayır, işə düşür və yavaş-yavaş aktivləşir”.

Bundan əlavə, A.Kondraxin yatmazdan əvvəl telefondan istifadə etməməyi tövsiyə edib.