Qubad İbadoğlu ilə bağlı yeni faktlar

ABŞ, Böyük Britaniya, Fransa və Almaniyanın Azərbaycandakı səfirliklərinin bu günlərdə saxlanılan Azərbaycan Demokratiya və Rifah Partiyasının sədri Qubad İbadoğlu ilə bağlı tvit paylaşımları Azərbaycanın daxili işlərinə kobud müdaxilə cəhdidir. Azərbaycan müstəqil ölkədir, belə məsələləri qanunlara uyğun şəkildə müstəqil məhkəmə orqanları tənzimləyir. Əgər Qərb ölkələri və onların buradakı nümayəndələri düşünürlərsə ki, əvvəlki qaydada Azərbaycanın daxili işlərinə müdaxilə edə, təzyiq göstərə bilərlər, çox yanılırlar. Məsələ ilə əlaqədar istintaq gedir və hər şey istintaqın nəticəsinə uyğun olacaq. İstintaqın gedişinə müdaxilə yolverilməzdir.

FETÖ terror təşkilatıdır. ABŞ onu dəstəkləyir və maliyyələşdirib. Bu təşkilat təkcə Türkiyədə deyil, bir çox ölkədə, o cümlədən də Azərbaycanda şəbəkə qurmuşdu. Qubad İbadoğlu ABŞ-də FETÖ-çülərin geniş ayaq açdığı Şimali Karolina, Dyuk və Rutqers universitetlərində işləyib, onlarla geniş əlaqələr qurub. Q.İbadoğlunun dəfələrlə Pensilvaniyaya səfər etməsi, Fətullah Gülənlə görüşməsi, təlimatlar almasına dair faktlar var və bu, bir müddət sonra açıqlanacaq. Qubad İbadoğlu Cəmil Həsənli ilə birlikdə Qərbdən, konkret olaraq ABŞ-dən böyük qrantlar alırdı. Bu layihələr qanun pozuntuları ilə icra olunur, vəsaitlər tam başqa istiqamətə yönəldilirdi. Konkret olaraq Qubad İbadoğluna Azərbaycanda FETÖ şəbəkəsini bərpa etmək, siyasi gərginliyi artırmaq, ictimai-siyasi sabitliyi pozmaq istiqamətində tapşırıqlar verilmişdi. Onun FETÖ-nün ABŞ, Türkiyə və Avropa ölkələrindəki gizli mərkəzləri, ocaqları ilə əlaqələri qurulmuşdu.

İndi Qərb ölkələrinin səfirliklərinin bu canfəşanlığını haradasa başa düşmək olar. Qubad İbadoğlu layihəsinə buraxdıqları böyük vəsaitlər batır. Ən əsası bəzi Qərb dairələrinin Azərbaycanda növbəti dəfə qarışıqlıq yaratmaq planı yenə də iflasa uğradı. Buna görə də Azərbaycan dövləti, ictimaiyyəti Qərb dairələrinin növbəti dəfə Azərbaycanda qarışıqlıq yaratmaq cəhdlərinə sərt reaksiya verməlidirlər. Məsələn, bu dairələr Macarıstanda öz planlarını reallaşdırmağa çalışdılar, amma Viktor Orban hökumətindən layiqli cavab aldılar.