"26 mini mənə necə yazıb?" | "Azəriqaz" vətəndaşa niyə külli miqdarda cərimə yazdı? - Baku TV

Baku TV-nin qaynar xəttinə müraciət edən Ramil Məmmədov iddia edir ki, “Azəriqaz” İstehsalat Birliyi tərəfindən ona 26 min manat məbləğində cərimə yazılıb.

Vətəndaş bu məbləği ödəmədiyinə görə qurum tərəfindən məhkəməyə verildiyini bildirib.

Ramil Məmmədovun sözlərinə görə, məhkəmə prosesinin nəticəsi onun xeyrinə olsa da, hesabına yazılmış borc silinməyib. Şikayətçi cərimənin hansı əsaslarla hesablandığının ona məlum olmadığını və qurum tərəfindən bununla bağlı heç bir foto və ya videogörüntünün təqdim edilmədiyini deyib.

“26 min manat yazmışdılar. Qaz idarəsinin əməkdaşı məhkəmənin birinci iclasına gəlmədi, ikinci dəfə gəlib iştirak etdi. Mənə maraqlıdır, bu məbləği necə hesablayıblar? Bir şəkil və ya video göstərsinlər ki, 26 min manatlıq qazı necə istifadə etmişəm. Əgər qanunsuz istifadə etmişəmsə, gəlib faktla sübut etsinlər. Mən indiyə qədər heç yerdə belə məbləğ görməmişəm”, – deyə şikayətçi bildirib.

Ramil Məmmədov həmçinin iddia edib ki, qaz təchizatı ilə bağlı mütəmadi problemlər yaşayır. Onun sözlərinə görə, qaz sayğacı dəfələrlə plomblanıb və bəzi hallarda sayğacın dəyişdirilməsindən əvvəl ona məlumat verilməyib. Buna görə də ailə qaz balonundan və odun sobasından istifadə etməyə məcbur qalır.